Mémoire présenté et défendu publiquement en vue de l'obtention du grade de Licencié en Langues et Littératures Africaines.

Résume,

Iki gikorwa ceerekeye umuryaango w'abahinda bo mu caankuzo n'umwuuga w'ukweegeka. Kigizwe n'ibigabane bitatu bitangurirwa n'intaangamaraara bigaherezwa n'ugusoozeera.

Muu ntaangamaraara tuvuga ivyeerekeye ubuhiinga bw'itoohooza, ibibazo nyamukuru vyizwe, ihaangiro, inyishu mfatakibanza, akamaro k'icigwa, igihe iciigwa gihagazeko, imihingo y'itoohooza, iyindi miryango yagereereye mu kareere k'itoohooza, ingene itoohooza ryagizwe, aboobajijwe mw'iitoohooza n'uumwihweezo w'inkuru.

Ikigabane caa mbere ceerekeye amaamuuko y'abahiinda n'akaahise kaabo. Abahinda baamuutse kuri seekuruza waabo nziramahiinda. Bamwe baavuukiye mu Buhuumuza, abaandi baaje bava i Nkoma ya Banege. Uwo muryaango ufise ibisata bibiri : Abahinda n'abahiindamaguru. Biivuga ngo ni Abateerantaambwe bo kwaa Rumaana. Bamwe mu baseekuruza baabo ruraangiranwa ni KAMUREENGA, Arcade MUREENGERA NA MWAANIRA; baarakoraniriza hamwe Abahiinda. Abaandi ni KAMAANA na KADEENDE, baari baazi guca imaanza neeza. Abahiinda baari batonye i buganwa kaandi muri bo haarimwo ubugereerwa.

Mu Kigabane caa kabiri tuvuga imico n'imigeenzo y'abahiinda, ubumenyi n'ubuhiinga bwaabo. Abahinda baamye bafise umubaano mwiiza, bakazira kurya inyama y'inka y'inyoomvyi caanke guhonyora mu mase yaayo, caarazira ko bashiingiranira n'Abahiinda nka bo. kaandi ntibaacaana ibiti vy'imiremeera n'imikubagwa. Baraterekeera intare n'inciira. Ikimazi caabo caari igicumu biise igiteerantaambwe.

Ikigabane caa gatatu gisiguura ivyeerekeye umwuga w'ukweegeka, uguhakura ubuuki, imiziro y'uuwo mwuuga, imico y'inzuki, uguca kwaazo, uruhara rw'umwuuga w'ukweegeka n'iivyo abavuumbi biipfuuza vyooteeza imbere uwo mwuuga.

Mu mpera y'iciigwa turasaba ko abatoohooji booshishikara gutoohooza ivyeerekeye imiryaango y'abaruundi n'imyuuga ibatuunze, hamwe n'ubuhinga bwaabo.